Ek Din Achanak Part 25
Idhar Jay aur uska gang wahan se aise bhage the jaise gadhe ke sar se seeng. Halanki Jay jaana to nahin chahta tha lekin apne doston ko kisi musibat mein nahin dalna chahta tha. Uski to duniya ujad hi gayi thi lekin doston ko koi nuksaan na pahunche isliye usne turant unhen wahan se nikalne ke liye bol diya tha.
Dono bike sadak par daudti huyi jaldi hi Jawed ke ghar par pahunch gayi. Bike jinse li gayi thi unhen wapas bhijwa kar sab dost baith gaye Jay ke paas aur usse poochne lage ki kya hua. Kya musibat aa gayi thi. Koi mil gaya tha kya wahan par. Jay ko rona aa gaya aur usne rote huye poori kahani suna di. Sab ki aankhon mein Sonali ke liye gussa aur Jay ke liye sahanubhuti paida ho gayi thi lekin wo log kar bhi kya sakte the.
Jay ka rona unse dekha nahin gaya lekin phir bhi wo use dilasa dete rahe. Jay ka dil boori tarah toot gaya tha. Jeewan mein uske andhera cha gaya tha. Jo roshni ki ek kiran Sonali ke milne ki khushi mein dikh rahi thi wo bhi khatam ho gayi thi. Usne sapne mein bhi nahin socha tha ki Sonali use dhokha degi. Kitni asaani se keh gayi wo ki pyaar nahin karti. Bhool jao sab. Uske liye to ye sab ek majak tha.
“Pehle to usne jeene marne ki kasmein khayi thi mere saath. Kehti thi ki Jay agar tum mujhe nahin mile to main zehar khakar jaan de dungi. Lekin aaj dekho wohi zehar usne meri jindagi mein ghol diya hai. Pyaar ko usne majak bana kar rakh diya hai. Kya haq tha use mere jajbaton se khelne ka. Mujhe pata hai ki main khubsurat nahin auron ki tarah lekin iska matlab ye nahin ki koi mere dil se, meri bhavnayon se, mere jajbaton se khele. Mujhe bemaut mar diya Sonali ne”
Sabki aankhon mein aansu najar aane lage the Jay ki baatein sunkar lekin koi kuch nahin bol raha tha kyunki wo log chahte the ki Jay apne dil ka dard shabdon ke jariye bahar nikal kar kuch had tak kam kar de. Jay ka dard unse dekha nahin ja raha tha, man kar raha tha ki jaake Sonali ko yahan pakad kar le aaye aur sabke saamne usse pooche lekin sab kuch sochne bhar se to nahin ho jaata. Wo laachar the waqt ke saamne, apne dost ke pyaar ke saamne, uski di huyi kasam ke saamne.
Jay bas badbadata ja raha tha “Mujhe tumne apne husn ke jaal mein fansa kar barbaad kar diya. Main hi paagal tha jo khubsurat chehre, haseen julfe, gehri aankhen (Itna sab hone par bhi tareef kar raha hai), najuk shareer, rasile honth, in sab ke peeche deewana huya jaa raha tha. Tumhari koi galti nahin hai Sonali, mujhe hi samajhna chahiye tha ki mujh jaise sadharan ladke se koi kyun aur kaise pyaar karega. Lekin is dil ko kaun samjhaye. Kabhi dimaag ki baat sunta hi nahin.
Kehte hain ki jab dil tootta hai to koi awaaz nahin hoti. Lekin is baar to aisi awaaz huyi thi ki Jay aur uske sab doston ko andar se hila diya tha. Jahan Manish ko khatra lag raha tha apni prem kahani mein wahin Jawed ne soch liya tha ki in sab jhanjhaton se door rahega. Lekin Jay ka kya uski to aisi halat ho gayi thi ki na jeete ban raha tha aur na marte.
Jab Jay shant huya to kafi der tak khamoshi chayi rahi kamre mein.
Ab koi kya bole kisi ko kuch samajh mein nahin aa raha tha. Jay ne hi chuppi todi aur Jawed se kaha ki use ghar jaana hai. Jay ko Manish ne ghar chod diya kyunki wo log use akele nahin jaane dena chahte the. Dil toota tha ek aashiq ka, na jaane kya kar baithe.
Lekin Jay ka dil majbut tha jo seh gaya nahin to aisi situation mein to kitne hi aashikon ne ya to crime ka sahara liya hai yaa phir atamhatya ki hai.
Lekin Jay sabse alag tha. Wo itna kamjor nahin tha ki atamhatya jaisa kadam utha le aur na hi uske parivaar ke sanskaar aise the jo use crime karne dete. Bas ek khamoshi si cha gayi thi uske dil mein. Ab kisi tarah ki koi ichha baaki nahin thi. Balki yun kaho jaise ek jinda laash ho jo apne shareer ka bojh utha kar ghoom rahi hai.
Jay ke kamre mein pahuchne ke baad Manish wahan baith kar Jay ka dard baantna chahta tha lekin Jay ke force karne par jaana pada. Manish ke jaate hi Jay ne kamra andar se band kiya aur takiye mein muh chupake jee bhar ke roya. Jay bas yahi soch raha tha ki uska rudan sunkar to bhagwan ko bhi taras aa jaata lekin pathar dil Sonali ke upar uska koi farak nahin padna tha.
Kehte hain pyaar insaan ko nikamma bana deta hai lekin Jay ka pyaar ne sab kuch loot liya tha. Honthon se muskurahat, chehre se khushi, seene se dil aur us dil se jajbaat. Sab loot kar kangaal bana diya tha. Lekin Jay ne ise apni kismat samajh kar sab bhagwan par chod diya aur bistar par let kar apne bhavisya ke baare mein sochne laga ki uska kya hoga aage. Kya wo Sonali ko bhool payega? Kya wo Sonali ke bagair ek nayi jindagi ki shuruat kar payega?
Uski mummy Manish ke jaane ke baad aayi aur Jay ke kamre ka darwaja khatkhataya. Kaafi der ho gayi lekin Jay ne nahin khola shayad rote rote wo so gaya tha. Uski mummy ne bhi socha ki wo so gaya hai to use araam karne do aur apne ghar ke kaamo mein lag gayi. Waise bhi agle din uska result aane wala tha. Isliye uski mummy ne socha ki poore exams ke time to bechara raat raat bhar padhai karta raha ab araam kar raha hai to karne do. Lekin unhen kya pata tha ki exams ke dino mein wo kis duvidha mein jee raha tha.
Raat mein Jay ke papa aaye aur aate hi unhone Jay ke liye poocha. Jay ki mummy ne dekha unke haath mein ek sundar sa bag hai. Unhone poocha ye kisliye hai to unhone bataya ki Jay ka kal result aane wala hai to main use uske paas hone ki khushi mein ye gift dunga.
“Lekin ye to bahut mehanga lagta hai. Itne paise kyun kharch kar diye is bag par. Hamara beta to waise bhi humse kabhi kuch nahin maangta. Kyun bewajah kharch kar rahe hain aap”
“Kaisi baat kar rahi ho tum. Uski kab se ichha thi ki uske paas bhi apna cricket kit bag ho. Lekin usne kabhi kuch nahin maanga. Hamesha uski aankhon mein main ek pyaas dekhi, ek udaasi dekhi. Lekin main itna kama hi nahin pata hoon ki uski sab ichha poori kar paun”
“Wo to theek hai lekin apne upar bhi to kharch kar lijiye. Ye shirt kitni purani ho gayi hai. Ab to ismein rafu karne ki bhi jagah nahin bachi hai. Kitni jagah se phat gayi hai. Aur kuch nahin to kam se kam ek nayi shirt to le lete”
“Main to budha ho chuka hoon. Ab mujhe kaun dekhega. Lekin tumhare liye ek nayi saree jaroor le aaya hoon”
“Itna kyun kharch kar diya. Aur ye bag to bahut mehanga lag raha hai mujhe. Kyun itna paisa uda diya bina baat ke”
“Kab tak doosron ka saaman maang kar kaam chalata rahega. Wo to Jawed use apna use karne de deta hai lekin kisi ka koi bharosa nahin kab palat jaye. Aur main kama kiske liye raha hun. Ek hi to beta hai mera. Mere budhape ki laathi agar uske liye kharch nahin karunga to kiske liye karunga. Waise hai kahan tumhara ladla”
“Wo so raha hai. Thak gaya hai shayad. Kal subah mil lena aap usse. Aap fresh hokar aaiye main khana laga deti hoon”
“Theek hai. Kal use main surprise dunga. Aakhir baap hoon uska. Mere bête ki ichha poori na ho ye kaise ho sakta hai. Mere jeeteji wo apni ichha ka kabhi gala nahin ghotega. Mujhse jitna ban padega main karunga uske liye. Aakhir uski wajah se school mein bhi mujhe samman ki najar se dekhte hain warna hum chote logon ko kaun poochta hai”
End of Episode 3
To be continued....
Kareem
13-Jan-2022 08:32 PM
Great
Reply
Swati chourasia
12-Oct-2021 07:34 PM
Very beautiful 👌
Reply
Shalini Sharma
30-Sep-2021 07:16 PM
Nice
Reply